Golden voice of CT - අසහාය ගායක සී.ටී. ප්‍රනාන්දු

මෙරට ගීත ක්ෂේත්‍රයේ පෙරළි රැසක් සිදුවූ 70 දශකයේ දී ජනප්‍රියත්වයේ හිනිපෙත්තට ළඟාවූ අසහාය ගායක සිරිල් ටියුඩර් ප්‍රනාන්දු හෙවත් සී.ටී. ප්‍රනාන්දු 

ඔහු ලංකාවේ ජනප්‍රිය ගීත කලාව හෙවත් සිංහල පොප් ගීතයේ පුරෝගාමියා වශයෙන් ද හැඳින්වේ. සිංහල තනු වලට, සිංහල ගී රචනාවලට බටහිර සංගීතය මුසු කිරීම මෙතුමාගේ පසුකාලීන ගීත වල පදනම බවට පත්විය. එම සම්ප්‍රදාය එම ගීත ජනප්‍රිය වීමට මූලික වශයෙන් බලපෑවේය. සී.ටී. ගැයූ සියළුම ගීත කාලය අභිබවා අදටත් එකසේ ජනප්‍රිය වීම පුදුම සහගතය. ඔහුගේ ගීත විනෝද චාරිකා වලදී, සුහද හමුවලදී එදත් අදත් ගායනාවීමම, ඔහු ලැබූ ජනප්‍රියත්වයට දිය හැකි කදිම නිදසුනකි. 

1921 ජනවාරි 28 දින මොරටුවේ දී උපන් සී.ටී. ප්‍රනාන්දු පාසල් වියේ සිටම පල්ලියේ කන්තාරු කණ්ඩායමේ නිත්‍ය ගායන ශිල්පියා බවට පත්විය. ළමා කාලයේ සිටම ප්‍රසංග වේදිකාවේ ඔහු ගී ගැයූවේය. සී.ටී. ට පමණක් ගී පද ලියූ ආර්.එන්.එච්. පෙරේරා රචකයාගේ “පින්සිදුවන්නේ අනේ බාල ළමුන්නේ” යන පදමාලාවට ලස්සන තනුවක් යොදා ඔහු නිර්මාණය කළ ගීතය ඔහුගේ මුල්ම ජනප්‍රිය ගීතය බවට පත්විය. ඒ 1947 දීය. කොළඹ රෙජිස්ට්‍රාර් ජනරාල් කාර්යාලයේ ලිපිකරුවෙකු ලෙස සේවය කළ සී.ටී. 1951 දී බදුල්ලේ ධනවතී ප්‍රනාන්දු නම් තම ගීත රසිකාවිය සමග විවාහ දිවියට එළඹුණි. ඔවුනට ලැබුණු එකම පුත්‍ර රත්නය පසුකලෙක ජනප්‍රිය ගායකයෙකු බවට පත්වූ ප්‍රියන්ත ප්‍රනාන්දුය. 

අද වන විට ආදරණීය ගායක සී.ටී. ප්‍රනාන්දු මහතාත් (අභාවය: 1977 ඔක්තෝබර් 17 දින) ඔහුගේ ප්‍රිය භාර්යාව වූ ධනා ප්‍රනාන්දු මහත්මියත් (අභාවය: 2012 සැප්තැම්බර් 25 දින) , ඔවුන්ගේ එකම පුතු වූ ගායන ශිල්පී ප්‍රියන්ත ප්‍රනාන්දු මහතාත් (අභාවය: 2018 මැයි 01 දින) ජීවතුන් අතර නොමැත. එනමුත් සී.ටී. ගැයූ ගී අදත් අමරණීයව පවතී. 

සී.ටී.ගේ ප්‍රියතම වාද්‍ය භාණ්ඩය බොක්ස් ගිටාරයයි. ඔහු ගීත 175 ක් පමණ ගායනා කොට තිබේ. එයින් ගීත 12ක් හැරෙන්නට ඉතිරි සියළු ගීත වල තනු නිර්මාණය කොට ඇත්තේ ඔහු විසින්මය. ඒවායින් කීපයක් නම්, 

පියුමෙහි පැණිබොති වන බඹරෝ - මල මත නොරැඳෙති කළු දෙබරු 

දහවල් නොදිලෙයි අඹරෙ තරු - අවරින් නොනැගෙයි නැගෙන හිරු 

මෙම ගීතය සී.ටී. ගේ අනන්‍යතා ගීතය ලෙස බොහෝ දෙනා හඳුන්වති. කරුණාරත්න අබේසේකර ශූරින් ලියූ මේ ගීතය සී.ටී. ගේද කැමතිම ගීතය විය. මේ නිසා ඔහු තම නිවස “වන බඹරෝ” ලෙස නම් කළේය. 

පුන්සඳ හිනැහෙන්නේ - වනමල් පිබිදෙන්නේ 

ලස්සන ඔබෙ මුහුණේ - දැක්කම නොවැ මැණිකේ (රචනය- විමලදාස පෙරේරා) 

මෙය ලංකාවේ ගීත කෝකිලාවිය වූ රුක්මණි දේවිය සමගින් ගැයූවකි. 

මී අඹ වනයේ ගී හඬ පතුරා කාවද අමතන්නේ 

ලස්සන මුහුණට ඇසවහ දෙන්නද ඔය හැටි හිනැහෙන්නේ 

ඔහුගේ ජනප්‍රිය ගී අතුරින් කීපයක් කෙටියෙන් සඳහන් කරන්නේ නම්....... 

අම්බිලි මාමේ ඔබ මොකද කරන්නේ - පුළුන් වළා යටින් ඉඳන් එබිල බලන්නේ (රචනය-ආර්.එන්.එච්. පෙරේරා) 

ඔන්චිලි චිල්ල මලේ ඔංචිල්ලාවේ - වැල්ල දිගේ එන්න මලේ නෙල්ලි කැළෑවේ (රචනය-කරුණාරත්න අබේසේකර) 

මා බාල කාලේ අම්මාගේ උකුලේ - නැලවූනු කාලේ මට තාම සිහිවේ (රචනය-මාලනී විජේසිංහ) සුවහසක් ගීත රසිකයින් වැළඳගත් මනරම් මව්ගුණ ගීයකි. 

සරුංගලේ සරුංගලේ කොයිබද යන්නේ - සුලං රැලේ හෙමින් සැරේ උඩට නගින්නේ (රචනය- කරුණාරත්න අබේසේකර) 

සැළලිහිණි කොවුල් හඬ රැව් දෙන්නා - මහ උයනක සිරි ඉතිරේ (රචනය- සරත් විමලවීර) 

බිළිඳා නැළවේ උකුලේ - හිනැහේ මල සේ කැකුළේ (රචනය- ඇලන්සන් පියදාස) මෙම ගීතය සී.ටී. තම එකම පුතු ප්‍රියන්ත වෙනුවෙන් ගැයූවකි. 

ඔහු ගැයූ ජාතිකාභිමානී ගී අතර “හෙළ ජාතික අභිමානේ - වැඩු විරුවන් සේ පොරණේ” සහ “අවදිවන්න, අවදිවන්න දීප්තිමත් දිනකි උදාවෙලා තියෙන්නේ” යන ගීත දනන් මුවග රැව්දුන් ගීත ලෙස සැලකිය හැක. 

එසේම ඔහු ගැයූ ප්‍රේමණීය ගී අතර  “සිහින ලොවේ මිහිර මැවූ මාලී - සිනහ නගයි ඔබයි මනාලී” (රචනය- ලලිත් එස්. මෛත්‍රීපාල) 

“කිමද සුමිහිරියේ මේ අරුමේ - මහද පිබිදෙන්නේ” (රචනය- කරුණාරත්න අබේසේකර) 

“රන්වන් රන් කෙඳි පීරාලා - චන්දන කල්කෙන් නෑවිලා” (රචනය- ලලිත් එස්. මෛත්‍රීපාල) 

“කොයිද අනේ හිමිදිරියේ දුවන්නේ - ගිලී මලේ තරුව ඔයානේ” (රචනය- සරත් විමලවීර) 

“ආනෙ ඩිංගක් ඉන්නකෝ - ඔය දෑත පොඩ්ඩක් දෙන්නකෝ” (රචනය- ඩී.සී. ජයසිංහ) 

“සීගිරි සුකුමාලියේ පෙර රජ දවසේ - මතකද අපි පාවුනා පෙම් අම නදියේ” (රචනය- සී.ටී ප්‍රනාන්දු) 

ඔහුගේ මධුර හඬ චිත්‍රපට කීපකටද දායක විය. ඔහුගේ ජනප්‍රිය චිත්‍රපට ගී අතර 

“මී වදයකි ජීවිතේ - මිපැණි පිරීලා ඇතේ, මත්වීලා ගුම් ගුම් නද දීලා - සැනසෙමු අපි හිතු මතේ” (චිත්‍රපටය-කවුද හරි) සහ “ලක්ෂ ගණන් වස්තු ලැබී ඉස්සර පින පෑදිලා” (චිත්‍රපටය- සාරවිට) යන ගීත වඩාත් ජනප්‍රිය විය. 

ගායකයන් අතර සොබාදහමට වඩාත් පෙම්බැඳි ගායකයා සි.ටී. විය හැක. ඔහුගේ පරිසරය හා වනසතුන් සම්බන්ධ ප්‍රකට ගී අතර “මල්බර හිමිදිරියේ පිපුණේ - ඇසළ අරලිය මාලා” (රචනය- සරත් විමලවීර), “මගෙ සුදු මාමේ මගෙ සුදු මාමේ - බෑ බෑ නොකියා” (රචනය- සුසිල් සේනාධීර), “දවස ගෙවී දැන් ටික ටික අඳුර වැටෙන්නා” (රචනය- ඇලන්සන් පියදාස), “ලෝ අඩ නින්දේ මේ රෑ යාමේ - සඳරැස් වතුරේ කිමිදෙන්නේ” (රචනය- සුසිල් සේනාධීර), “අඹරුක් සෙවනැල්ලේ - මේ රන් ඔංචිල්ලේ” (රචනය- ආනන්ද ජයසේන) යන ගී මුල්තැනක පවතී. 

ලංකාවේ සුපිරි හෝටල්වල ගී ගැයූ සී.ටී. ගේ හඬට ඇලුම් කළ “මැඩම් ඩෙල්ගාඩෝ” නම් යුරෝපීය ඔපෙරා ගායිකාව සී.ටී. ට ලන්ඩනයේ ප්‍රසංගයක් පැවැත්වීමට ආරාධනා කළාය. මේ අනුව විදෙස් රටක සංගීත ප්‍රසංගයක් පැවැත්වූ මුල්ම ශ්‍රී ලාංකික ගායකයා සී.ටී. ප්‍රනාන්දුය. 1969 වසරේ ලන්ඩනයේ පොදු රාජ්‍ය මණ්ඩල ශාලාවේ ගීත ගැයූ ඔහු "Golden Voice" (රත්තරන් හඬ) සම්මානයෙන් පිදුම් ලැබීය. 

මුල් කාලයේ එනම් 60 දශකයේදී පමණ සී.ටී. ප්‍රනාන්දු ගීත ගායනා කළේ පෙරදිග සංගීතය අනුව යමිනි. ඔහු “පියුමෙහි පැණි බොති වන බඹරෝ” ගීතය ගායනා කළේ මේ සමයෙහිදීය. එකල සිටි “ජෙට්ලයිනර්ස්” නමැති වාදක කණ්ඩායම මෙම වන බඹරෝ ගීතය බටහිර සංගීතය හා මිශ්‍ර කරමින් ප්‍රිය සම්භාෂණ, මංගල උත්සව ආදියෙහි ගායනා කළහ. මෙහිදී බටහිර සංගීතය ප්‍රිය කළ පිරිස් අතර “වන බඹරෝ” ගීතය ක්ෂණික ජනප්‍රියත්වයට පත්විය. එතැන් පටන් බටහිර සංගීතය හා මුසු කරමින් සී.ටී. ගායනා කළ ගීත එකින් එක ජනප්‍රිය වන්නට විය. 

සී.ටී. ප්‍රනාන්දුගේ ගීතයක් මුලින්ම තැටිගත කිරීම සඳහා ඔහුට ආරාධනා කළේ එවකට සංගීත ක්ෂේත්‍රයේ පුරෝගාමියෙකුව සිටි ජෙරල්ඩ් වික්‍රමසූරිය මහතාය. යම් හේතුවක් නිසා වික්‍රමසූරිය මහතාට එම අවස්ථාවේ දී එය සිදුකරගත නොහැකි විය. ඔහුට පෙර ලුවිස් බ්‍රවුන් නම් සමාගම “කොලොම්බියා” ලේබලය යටතේ සී.ටී. ගේ ගීත තැටිගත කිරීමට අවස්ථාවක් ලබාගත්තේය. 

ජෙරල්ඩ් වික්‍රමසූරිය

1977 දී සී.ටී. ප්‍රනාන්දු වියෝ වූ පසු , යළිත් වරක් සී.ටී.ගේ ගීත සුවහසක් රසික රසිකාවියන් අතට පහසුවෙන් පත්කිරීමට ඉඩ ලැබුණේ මේ ජෙරල්ඩ් වික්‍රමසූරිය මහතාගේ අප්‍රතිහත ධෛර්යය නිසාය. එවකට සී.ටී.ගේ ගීතවල අයිතිය තිබුණේ ඉන්දියාවේ සමාගමකටය. මාස්ටර් ටේප් එක තිබුණේ ද ඉන්දියාවේය. සී.ටී. ප්‍රනාන්දු මහත්මියගේ අවසරය පිට ජෙරල්ඩ් වික්‍රමසූරිය මහතා ඉන්දියාවට ගොස් සී.ටී.ගේ මාස්ටර් ටේප් එක සොයාගත්තේය. ඔහු එයින් පිටපතක් රැගෙන ලංකාවට පැමිණ සී.ටී.ගේ තැටි “ගෝල්ඩන් වොයිස් ඔෆ් සී.ටී.” නමින් නිෂ්පාදන කටයුතු ආරම්භ කළේය. 

සී.ටී. ප්‍රනාන්දු අභාවප්‍රාප්ත වූයේ 1977 දී නිසා එම වසර එක්සත් ජාතික පක්ෂය බලයට පැමිණි වකවානුවයි. එම රජය හඳුන්වාදුන් විවෘත ආර්ථිකයත් සමග ගීත කලාවේ තාක්ෂණික හරඹයන්ද සිදුවිය. ගුවන් විදුලියට අමතරව මෙතෙක් ගීතය ජනතාව අතරට ගෙනගිය මාධ්‍යය වූ ගී තැටිය වෙනුවට කැසට් පටය කරළියට පැමිණියේය. ලංකාවේ කැසට් ව්‍යාපාරයේ ප්‍රාරම්භකයා වූ විජය රාමනායක ගේ තරංගා නම් වූ කැසට් ව්‍යාපාරය දියුණු තත්වයක තිබිණි. විජය රාමනායක සී.ටී. ප්‍රනාන්දුගේ කැසට් පටයක් නිර්මාණය කළේය. මේ අනුව සී.ටී. ගේ ප්‍රථම කැසට් පටය විජය රාමනායකගේ නිෂ්පාදනයකි. නමුත් එම කැසට් පටය සඳහා ගීත ලබාගත්තේ සී.ටී. ගේ ගෝල්ඩන් වොයිස් තැටියෙන් විය හැකිය. ඒ නිසාදෝ එම කැසට් පටයට විරුද්ධව සී.ටී. ප්‍රනාන්දු මහත්මිය නඩු මගට ගිය කතාවක්ද අසන්නට ලැබේ. 

සී.ටී. ප්‍රනාන්දු මහතාගේ ගීතවල තුන්වන අදියර ඇරඹුණේ 1996 දීය. ඒ තාක්ෂණික ක්‍රමයක් මගින් ගායකයාගේ හඬ හැර මුල් සංගීතය මකා දමා මුල් සංගීතයට හානියක් නොවන අන්දමින් උසස් සංගීත ගුණයක් සහිත නව සංගීතය මුසුකොට නැවත ගීත නිර්මාණය කිරීමයි. මේ ගීත ගබඩා වූයේ සංයුක්ත තැටියකටය. මේ කර්ත්‍යවය සිදුකළේ ද ජෙරල්ඩ් වික්‍රමසූරිය මහතාය. ඔහු මේ ගීත ඔහුගේම ව්‍යාපාරයක් වූ “සූරිය” ලේබලය යටතේ නිකුත් විය. මේ නිසා අද වනවිට රසිකයින්ට උසස් රසවින්දනයක් සහිත සී.ටී. ගේ ගීත ශ්‍රවණය කිරීමට භාග්‍යය උදාවී තිබේ. 

සුවහසක් රසිකයින් ගීතයෙන් අමන්දානයට පත්කළ සී.ටී. ප්‍රනාන්දු නම් අසහාය ගායන තරුව සදහටම නිහඬ වූයේ 1977 ඔක්තෝබර් 17 දින දීය. ඒ හෘදයාබාධයක් හේතුවෙනි.  

මේ ලිපියට පාදක වූයේ මාධ්‍යවේදිනි නෙළුම් ගුණරත්න, මාධ්‍යවේදී හරිත් ගුණවර්ධන සහ මාධ්‍ය වේදී මිල්ටන් මලවි ආරච්චි විසින් ලියන ලද පුවත්පත් ලිපි ඇසුරිනි. ඔවුන්ටත් ස්තුතිය පුද කරමි.

Kanneliya-International Biosphere Reserve - කන්නෙලිය - අන්තර්ජාතික ජෛවගෝල රක්ෂිතය

කන්නෙලිය - අන්තර්ජාතික ජෛවගෝල රක්ෂිතය

කන්නෙලිය වනාන්තරය හඳුන්වන නවතම විශේෂණ පදය එයයි. පසුගියදා එහි සංචාරයක යෙදුනෙමි. මුහුණු පොතේ ඉන්නා දෙස් විදෙස් මිතුරන්ගේ හා මේ පිලිබඳව උනන්දුවක් දක්වන හා මෙය නැරඹීමට කැමැත්තක් ඇති කෙනෙකුට ප්‍රයෝජනවත් විය හැකි ආකාරයේ තොරතුරු ටිකක් ගෙන ඒමට අදහස් කරමි. ඒවා අතර, KDN වනාන්තර සංකීර්ණය - කන්නෙලිය ඉතිහාසය කෙටියෙන් - එහි විශාලත්වය හා පිහිටීම - දේශගුණය - කන්නෙලියට පහසුවෙන් යාහැකි ගමන් විස්තරය - රජයේ හා පුද්ගලික නවාතැන් පහසුකම් - ප්‍රවේශ පත්‍ර ගාස්තු - ගමන් පැකේජ් ගාස්තු - මගපෙන්වන්නන් - කන්නෙලියටම ආවේනික වන සතුන් හා ගස්වැල් - දැඩි නීති රීති - දැව කැපීම - දැව ජාවාරම් - වල්ලපට්ට - 89 ජවිපෙ ක්‍රියාකාරකම් - ටයර් සෑය යන සියල්ල කෙටියෙන් විස්තර වෙයි.

කන්නෙලිය වනාන්තරය යනු එකිනෙකට යාබදව පිහිටි කන්නෙලිය (K) දෙදියගල (D) සහ නාකියාදෙනිය (N) යන වනාන්තර තුන ඇතුලත් (KDN) වනාන්තර සංකීර්ණයේ කොටසකි. මෙම වනාන්තර තුනෙන් විශාලම එක කන්නෙලියයි. කන්නෙලිය - දෙදියගල - නාකියාදෙනිය වනාන්තර සංකීර්ණයේ වපසරිය අක්කර 26,800 ක් (හෙක්ටයාර් 10,867 ක්) වන අතර කන්නෙලිය වනාන්තරයේ පමණක් විශාලත්වය අද අක්කර 13,108 කි. (හෙක්ටයාර් 5,305 ක්) එය අතීතයේදී අක්කර 15,200 ක් ලෙස පැවතුණි. (හෙක්ටයාර් 6,144 ක්) වේ. (KDN) වනාන්තර සංකීර්ණය “මිනිසා හා ජෛව ගෝල සංචිතයක්” (Man & Biosphere Reserve) ලෙස යුනෙස්කෝව විසින් නම්කර තිබේ.

කන්නෙලිය රක්ෂිතය Bio diversity hot spot හෙවත් ජෛව විවිධත්වය අනුව අතිශයින්ම වැදගත් වනාන්තර කලාපයක් ලෙස සැලකේ. එක් කුඩා ප්‍රදේශයක හමුවන වැඩිම ජෛව විවිධත්වය වාර්තා වන්නේ කන්නෙලියෙනි.

ලංකාවට පමණක් අවේණික බොහෝ සත්ව හා ශාක විශේෂ වලට රැකවරණය සලසන පුංචි සිංහරාජය ලෙස හඳුන්වන මෙම කන්නෙලිය වන රක්ෂිතය පහතරට තෙත් සදාහරිත වනාන්තරයක් ලෙස වර්ගීකරණය කර තිබේ. (Low country wet evergreen forest)

පිහිටීම

එය ශ්‍රී ලංකාවේ නිරිත දිග කොටසේ ගාල්ල නගරයට කිලෝමීටර් 35 ක් පමණ ඊසාන දෙසට වන්නට පිහිටා තිබෙන්නකි. 

දේශගුණය

KDN සංකීර්ණයේ සාමාන්‍ය භූ විෂමතාවයට කඳු වැටි, නිම්න සහ අඩු උසකින් යුක්ත හුදෙකලා කඳු ඇතුළත්ය. දළ වාර්ෂික වර්ෂාපතනය මිලි මීටර් 3500 – 4500 කි. මැයි මස මැද භාගයේ සිට සැප්තැම්බර් මස අග දක්වා සාමාන්‍ය වාර්ෂික වර්ෂාපතනය මිලිමීටර් 4445 ක් පමණ වේ. සාමාන්‍ය මාසික උෂ්ණත්වය 270C පමණ වේ.

මාර්ග විස්තරය - කොළඹ සිට ගමන් කිරීමේදී

පහසු ගමන් මාර්ගය - දක්ෂිණ අධිවේගී මාර්ගය භාවිතය - කොට්ටාවේ සිට යන්නේ නම් පින්නදූව හුවමාරුවෙන් එළියට පැමිණ (‍කොට්ටාවේ සිට101kmක් පැමිණ) ගාල්ල-උඩුගම මාර්ගයට පිවිසිය යුතුය. එතැන් සිට උඩුගම දෙසට තවත් කිලෝ මීටර් 25ක් (25km) උඩුගම නගරය දක්වා පැමිණ එතැන් සිට තවත් ඉදිරියට කිලෝ මීටර් 9ක් ගියවිට මාර්ගයේ දකුණු පසින් කන්නෙලියට දිවෙන අතුරු මාර්ගය හමුවේ. එම මාර්ගයේ හරියටම කිලෝ මීටර් 1.5 ක් ගියවිට කන්නෙලිය ප්‍රධාන පිවිසුම් දොරටුවට ළඟාවිය හැක. (මෙම කන්නෙලිය මාර්ගය අවසන් වන්නේ පිවිසුම් දොරටුවෙනි)

විකල්ප මාර්ග2 - කොට්ටාවේ සිට දක්ෂිණ අධිවේගී මාර්ගය භාවිතය - පින්නදූව හුමාරුවට කලින් හමුවන බද්දේගම හුවමාරුවෙන් වම්පසින් එළියට පැමිණ නාගොඩ මාර්ගයෙන් උඩුගම දක්වා පැමිණ ඉතිරිය ඉහත දක්වා ඇති ආකාරයට පැමිණිය යුතුය.

මේ සිතියම විශාල කර බැලීමෙන් කන්නෙලියේ අභ්‍යන්තර පිහිටීම ඔබට අවබෝධකරගත හැකිය.

විශේෂයි...

ඔබ ලංකාවේ කුමන පෙදෙසකින් පැමිණියත් ගාල්ල උඩුගම මාර්ගයට අනිවාර්යයෙන්ම පැමිණිය යුතුය. එතැන් සිට කන්නෙලිය ප්‍රවේශ මාර්ගයට පැමිණිය යුතුය. එයට හේතුව කන්නෙලිය විශාල වනාන්තරයක් වුවත් වෙනත් කිසිම පෙදෙසෙකින් නීත්‍යානුකූලව ඇතුළුවීමට නොහැකි වීමයි.

කන්නෙලිය පිවිසුම් මාර්ගය - ඈතින් පේන්නේ දොරටුවය. දෙපසින් පෙනෙන්නේ නන්නිකිත ඇළයි. එයින් සංචාරකයින්ට ස්නානය කිරීමට අවසර ඇත.

පිවිසුම් දොරටුවේ ඵලකය

ප්‍රවේශ පත්‍ර කවුළුව

ඉතිහාසය කෙටියෙන්

කන්නෙලියේ අතීතය වලගම්බා රජ සමය දක්වාම දිවයයි. විජයබාහු රජතුමා හා සොලීන් අතර මෙම ප්‍රදේශවල පැවති සටන් පිලිබඳව ජනප්‍රවාදයේ සඳහන්වේ. කන්නෙලිය යන්න කන්‍ය එලිය යන්නෙන් බිඳී ආ බව ඇතැම් අය විශ්වාස කරයි. වලගම්ගම්බා රජු මෙම ප්‍රදේශ ආශ්‍රිතව සැඟවී සිටින කාලයේ කුසගින්නේ සිටි කාන්තාවකට තම බත්පත ලබා දී “කන්න ලිය” යැයි පැවසූ ස්ථානය කන්නෙලිය වූ බවට තවත් මතයක් පවතී. 

1934 - වන සංරක්ෂණ දෙපාර්තමේන්තුව විසින් රක්ෂිත වනාන්තරයක් ලෙස ප්‍රකාශයට පත්කරයි.

1990 - සංරක්ෂිත වනාන්තරයක් ලෙස නම් කරයි.

2004 - යුනෙස්කෝව (UNESCO) විසින් මෙම වනාන්තරය අන්තර්ජාතික ජෛවගෝල රක්ෂිතයක් ලෙස ප්‍රකාශයට පත්කරයි.

දැව කැපීම නිසා වනයට වූ හානිය

රක්ෂිත වනයක් වුවත් රජයට අයත් නිසාදෝ වසර 1960 – 1977 අතර කාලයේදී මෙහි මහා පරිමාණයෙන් ගස් කැපීම සහ දැව ප්‍රවාහනය සිදුකොට තිබේ. එසේ කර තිබෙන්නේ රාජ්‍ය දැව සංස්ථාවයි. මේ අනුව රජයට හා රජයට අයත් ආයතන සඳහා වන දැව අවශ්‍යතාව ඉටුකර තිබෙන්නේ ජෛව විවිධත්වයෙන් පොහොසත්ව ඇති (එවකට ජෛව විවිධත්වයේ වටිනාකම වැඩි දෙනෙක් අවබෝධ කර නොගෙන ඉන්න ඇති) මෙම වනාන්තරයේ එක දිගට දැව කැපීමෙනි. මෙම දැව ගාල්ල ගිංතොට තුනී ලෑලි කර්මාන්ත ශාලාවට රැගෙ ගිය බව කියවේ. මෙය රජයේ නීතිය අනුව වරදක් නොවූවත් සතා සිවුපාවුන්ට හා වනයට ආදරය කළවුන්ට අනුමත කළ හැකි දෙයක් නොවීය. මේ නිසා විටින් විට ජනතා විරෝධය මේ ක්‍රියාවට එරෙහිව එල්ලවන්නට විය. 

වනය ආශ්‍රිතව ගම්මුන්ගේ අත්දැකීම් වලින් බිඳක්

මෙම වනාන්තරය අසල තවමත් ජීවත්වන පැරැන්නන් හමුවී ඉතිහාස තොරතුරු ලබාගත්තෙමි. එවකට (1989) කැරැල්ලකට සහභාගී වී සිටි ජනතා විමුක්ති පෙරමුණේ සාමාජිකයින් මෙම ඝන වනාන්තරය ඔවුන්ගේ කටයුතු සඳහා භාවිතා කර තිබූ බව දැනගන්නට ලැබුණි. ජවිපෙ සහ ගස් කැපීමේ නිරත නිලධාරින් අතර ද ගැටුම් ඇතිවූ බව කියවේ. දිනක් ජවිපෙ කැරලිකරුවන් සිය ගණනක් පැමිණ වනය වටකොට පිවිසුම් දොරටුවට පැමිණ වන සංරක්ෂණ කාර්යාලයට ද ප්‍රහාරයක් එල්ලකර ඇත. එහිදී දේපළ හා දැව ප්‍රවාහන කරන වාහන ගිනිතබා විනාශ කළේලු. ප්‍රහාරයේදී මරණ සිදුවුණේදැයි පැහැදිලි නැත. දින කීපයකට පසු මේ ප්‍රහාරයට පලිගැනීමක් වශයෙන් ජවිපෙ සාමාජිකයින් කීප දෙනෙකු වනාන්තරය තුල යම් ස්ථානයක ටයර් සෑයක පිළිස්සී ගිය බව ගමේ බොහෝ දෙනා පවසන කතාවයි. නමුත් මෙය ඇත්තක් ද යන්න හරියටම කිව නොහැක්කේ මේ කතාවේ කොනක්වත් අන්තර්ජාලයෙන් හෝ ලිඛිත වාර්තාවලින් මට සොයාගත නොහැකි වූ නිසාය. ටයර් සෑය තිබුනා යැයි ගම්මුන් කියන පිළිස්සී ගිය බිම අවුරුදු 30 කට පසුත් තවමත් දකින්නට ලැබීම පුදුම සහගතය. (මා විසින් ගන්නා ලද මෙහි ඡායාරූපයක් මෙම ලිපියේ ඇත.)

ටයර් සෑය තිබුනා යැයි කියන පිළිස්සී ගිය බිම අද 

කෙසේ වෙතත් කැරැල්ලෙන් පසු එවකට පැවති රජය සුබවාදී තීරණයක් ගෙන තිබුණි. ඒ කන්නෙලිය වනාන්තරයේ දැව කැපීම හා ප්‍රවාහනය සම්පූර්ණයෙන් නවතා දැමීමට ගත් තීරණයයි. මෙය වනාන්තරයට ආදරය දැක්වූවන් ලැබූ ජයග්‍රහණයකි. මේ නිසා වනාන්තරය 1990 දී සංරක්ෂිත වනාන්තරයක් ලෙස නම් කරනු ලැබීය.

වටිනා ශාඛයක් වන වල්ලපට්ට බහුල ලෙස මෙම වනාන්තරයේ වැවී තිබේ. ඇතැම් අය රහසේ වනයට රිංගා වල්ලපට්ට සොරකම් කළ අවස්ථා ඇත. වල්ලපට්ට සොරකම්කර අසුවූ අයෙකු පිවිසුම් දොරටුවේ සිට පොලීසිය දක්වා ගෙනයන්නේ නිලධාරින් සහ ගමේ අයගේ ගුටිබැට සංග්‍රහ මැදින්ය. පසුගිය දිනක රාත්‍රියේ විදෙස් යුවලක් තමන් නවාතැන්ගෙන සිටි ස්ථානයෙන් බැහැරව කන්නෙලිය වනාන්තරයට රහසේ ඇතුළු වී තිබේ. ඔවුන් මූලික වරදවල් දෙකක් සිදුකොට තිබුණි. එකක් අවේලාවේ වනාන්තරයට ඇතුළු වීමයි. (සවස 6න් පසු වනයට ඇතුළු වීම තහනම් කර ඇත.) අනෙක ප්‍රධාන පිවිසුම් දොරටුවෙන් ඇතුළු නොවී වෙනත් තැනකින් ඇතුළු වීමයි. තම ගැනුම්කරුවන් ආපසු ඒමට ප්‍රමාදවීම සම්බන්ධයෙන් නවාතැන්පලේ අයිතිකරු පිවිසුම් දොරටුවේ ආරක්ෂක නිලධාරින්ට පැමිණිලි කළේය. ආරක්ෂක අංශ කැලයේ සෝදිසි කර ඔවුන්ව අල්ලා ගෙන තිබේ. අත් අඩංගුවට ගත් විදෙස් යුවල උසාවියට රැගෙන යන ලදින් අන්තිමේ සිර දඬුවම් විඳීමටද ඔවුන්ට සිදුවිය. 

වනාන්තරයේ වැදගත්කම

දැව කැපීම නතරවීමෙන් පසු අවුරුදු 27ක් තුල වනාන්තරය නැවත ඝනව වැඩී තිබෙන්නේ ද්විතියික වනාන්තරයක් ලෙසිනි. කාලයක් තිස්සේ වූ දැව හෙළීම් නිසා මෙම රක්ෂිතයේ දැවැන්ත විශාල ගස් බහුලව දක්නට නැත. වැඩි වශයෙන් දක්නට ඇත්තේ සිහින් කඳ ඇති ශාඛය. පහළටම හිරු කිරණ පතිත වීම නිසා වියන් ස්තරය, උපවියන් ස්තරය, පඳුරු ස්තරය හා යටි වියන් රෝපණය වශයෙන් වනාන්තරය බෙදී පවතී. මේ නිසා වනාන්තරය, ලාක්ෂණික ස්ථර රැසකින් සමන්විත, ජෛව විවිධත්වය අතින් ඉතා ඉහළ තලයක් ඇති, ඉතාම ඉහළ මට්ටමක වර්ධනයක් පෙන්නුම් කරන වනාන්තරයකි. මෙහි ශාක විශේෂ සංඛ්‍යාව ඉතා ඉහළ අගයක පවතින අතර, සපුෂ්ප ශාක විවිධත්වය ද සාපේක්ෂව ඉහළ අගයක පවතී. මේ නිසා සිංහරාජ වනාන්තරයට වඩා කන්නෙලිය ජෛව විවිධත්වයෙන් අනූන ස්ථානයක් බවට පත්වී ඇති බව වන විද්‍යාඥයින්ගේ අදහසයි. (ජෛව විවිධත්වයෙන් අනූන යනු කුඩා වර්ග ප්‍රමාණයක පවා සත්ව හා ශාක විශේෂ සිය ගණනක් තිබේය යන්නය.)

හදිසියේ හමුවූ කළු ගැරඬියා

කන්නෙලියටම ආවේනික වෘක්ෂයක් වන මැන්ඩෝරා (Stemonoporus Kanneliyensis)

ලංකාවටම අවේනික සතුන් හා ගස්වැල්ද, කන්නෙලියටම ආවේනික සතුන් හා ගස්වැල් ද තිබීමෙන් මෙම වනාන්තරයේ වටිනාකම මිල කළ නොහැක. ජාත්‍යන්තර වශයෙන් මෙම දත්තයන් ශ්‍රී ලංකාවට ඉතා වටී. දෙස් විදෙස් පර්යේෂකයින්ට ද මෙම කරුණ ඉතා වැදගත්ය. සංචාරක කර්මාන්තයට ද මෙය වැදගත්ය. වනාන්තරය විනාශ වුවහොත් ඒ සියල්ලම විනාශවී යයි.

වෘක්ෂයක් දිගේ ඉහළට යන වෙනිවැල් 

මෙහි ජීවත්වන ශාක විශේෂ සහ සත්ව විශේෂ පිළිබඳව වැඩි විස්තර අන්තර්ජාලයෙන් ලබාගත හැක. මෙම වනාන්තරය පිළිබඳ දීර්ඝ පර්යේෂණයක් කොට එච්.කේ.එන්. කරුණාරත්න මහතා විසින් ග්‍රන්ථයක් සම්පාදනය කොට ඇත. ඔබට එයින් බොහෝ විස්තර ලබාගත හැක. පිටු 225 කින් සමන්විත එම ග්‍රන්ථය ඔබට රු. 600/-ක මුදලකට ආපනශාලාවෙන් ලබාගත හැක.

කන්නෙලිය පිළිබඳ ග්‍රන්ථය

වනාන්තරය ඇතුලත පරිසරය හා භූ විෂමතාව සහ බැලීමට හැකි දේ

ශ්‍රී ලංකාවේ දකුණේ ප්‍රධාන ගංගාවන් වන ගිං ගඟ සහ නිල්වලා ගඟට ජලය සපයන ප්‍රධාන ජල පෝෂක ප්‍රදේශය වන්නේ මෙම KDN වනාන්තර සංකීර්ණයයි. වනාන්තරය තුලින් ආරම්භ වන දිය දහරා විශාල සංඛ්‍යාවක් පවතින බැවින්, ජල විද්‍යාත්මක වැදගත්කම අතින් දකුණු ලංකාවේ මුල් ස්ථානය කන්නෙලිය වනාන්තරයට හිමිවේ. මෙම කුඩා ජල දහරාවන් ප්‍රධාන දිය දහරා තුනකට ජලය සපයයි. ඒ නන්නිකිත ඇළ, කන්නෙලිය ඇළ හා උඩුගම දොළයි. මෙම අතු ගංගා තුන ඔස්සේ ගිං ගඟට ජලය සැපයේ. එක් අතු ගංගාවකින් මීටර් 46 ක් උස අනගිමල ඇල්ල සහ මීටර් 70 ක් උස නාරංගස් ඇල්ල යන අති සුන්දර දිය ඇලි උපත ලබයි. ඇතැම් දොළ පහරකින් ගලායන ජලය බීමට ගතහැකි ලෙස ඉතාම පිරිසිදුය.

දිය කඳුරුවලින් ගලායන ජලය බීමට සුදුසුය.

මහවන මැදින් ගලායන සුන්දර

අනගිමල ඇල්ල.

අනගිමල ඇල්ලේ සුන්දරත්වය විඳිමින්

දැව ප්‍රවාහනයට යොදාගත් කොටන් ලොරි ගමන් කිරීමට වනය මැදින් ඉදිකළ තාරදමා සකස්කළ මාර්ග පද්ධතිය, අදත් දක්නට ඇත. එය අද සංචාරකයින් ගමන් කරන මාර්ගය බවට පත්වී ඇත. කොහොම කොටන් ඇදීමක් එදා සිදුවුණේදැයි සිතෙන හැඟීමක් මෙම මාර්ග නරඹන විට සංචාරකයාට නිතැතින්ම ඇතිවේ. එසේම එදා දැව කැපීමේ කටයුතු සඳහා ඉදිකරන ලද ගොඩනැගිලිද දක්නට ඇත.

එදා කොටන් ලොරි ගමන් කළ මාර්ගය අද සංචාරකයන්ට පහසුවෙන් ගමන්කළ හැකි මාර්ගයක් බවට පත්වී ඇත.

විශාල ලොරි ගමන් කළ ඇලක් උඩින් තැනූ එක් මාර්ගයක් දැන් සම්පූර්ණයෙන් කැඩී ඇති අතර  එහි කණ්ඩියක් දිගේ ගමන් කරමින්.

වතුරේ බැස වවුල් ගුහාව තුලින් යායුතුය

වනය තුල මෙවැනි නැරඹුම් අට්ටාල සහ ගිමන් හල් කීපයක් පිහිටුවා ඇත.

මෙවැනි ලී පාලම් කීපයක්ම අතරමගදී හමුවේ.

වනාන්තරයේ සුන්දරත්වයට හා ගංගා බිහිවීමට හේතුවන උස් කඳු ශිඛරයක්ද වනය මැද පිහිටා ඇත. ඒ කබ්බලේ කන්දයි. බොහෝවිට විශ්ව විද්‍යාලවලින් පැමිණෙන සිසුන් ඔවුන්ගේ ක්ෂේත්‍ර අධ්‍යයන සඳහා මෙම කන්ද තරණය කිරීමට පෙළඹී සිටිති. කබ්බලේ කන්ද තරණය කර ආපසු ඒමට සම්පූර්ණ දිනක්ම ගතවන බව පැවසේ. එහි සිට බිම බැලූවිට හික්කඩුව වෙරළේ සිට මාතර වෙරළ දක්වා මුහුද දර්ශනය වන බව කියවේ. (මතු දිනක කබ්බලේ කන්ද නැගීමටත් බලාපොරොත්තුවෙමි) එයට අමතරව කොන්ඩගල කන්ද ඇතුළු කඳු මුදුන් 20ක් පමණ මෙම වනාන්තරයේ පිහිටා ඇත.

කබ්බලේ කන්ද ඈතට පෙනෙන අයුරු

වනාන්තරය පාලනයට දැඩි නීති රීති

වර්තමානයේදී මෙම වනාන්තරය පාලනය කරනු ලබන්නේ වන සංරක්ෂණ දෙපාර්තමේන්තුවයි. දිවයිනේ වෙනත් වනාන්තර වලට වඩා පරිසර විරෝධී මිනිස් ක්‍රියාකාරකම් වලින් මෙම වනාන්තරය හොඳින් ආරක්ෂාවී ඇත්තේ දෙපාර්තමේන්තුව විසින් පනවා ඇති දැඩි නීතිරීති නිසාය. ඒවා නම්

1.මග පෙන්වන්නෙකු නොමැතිව කිසිම පුද්ගලයෙකුට හෝ කණ්ඩායමකට වනයට ඇතුළු වීමට අවසර නොලැබේ.

2. වනය තුලට වනය තුලට මත්පැන් ගෙනයාම, වනය තුල මත්පැන් පානය, මත්වූවන් වනය තුලට ඇතුළුකර ගැනීම සම්පූර්ණයෙන් තහනම්ය.

2. වනය තුලට පොලිතීන් හා ඒ ආශ්‍රිත ද්‍රව්‍ය ගෙනයාම තහනම්ය.

3. වනය තුලට ආහාර පාන හා ප්ලාස්ටික් ජල බෝතල් රැගෙන යාමට ඉඩදෙන අතර ආපසු නික්ම යාමේදී ඒවායේ දවටන හෝ හිස් බෝතල් ආරක්ෂක නිලධාරින්ට පෙන්විය යුතුය.

4. ගස්වැල් හෝ ඒ ආශ්‍රිත කොටස් සොරකම් කිරීම, සතුන් හෝ සත්ව කොටස් සොරකම් කිරීම සපුරා තහනම්ය. එසේම සංචාරකයින්ට ගස්වැල් වලට හෝ මල්වලට හානි නොකරන ලෙස අවවාද කෙරේ.

5. වනය තුල ඇති කිසිම දිය ඇල්ලකින් ස්නානය කිරීම සපුරා තහනම්ය.

මෙම දැඩි නීති රීති නිසාදෝ වනයට මුලින්ම ගිය කෙනෙකුට වුවද සිතෙන්නේ මිනිස් පහස නොලද කැළයකට තමා ඇතුළු වී ඇති බවට වූ හැඟීමකි. මම ද එක් අත්දැකීමක් ලදිමි. අපගේ මග පෙන්වන්නා, පසුගිය සතියේ දිනක පැමිණි 200 කට අධික පාසල් ළමුන් පිරිසක් තම දහවල් ආහාරය ගත් ස්ථානයක් කැලය තුලදී මට පෙන්වීය. මං නිකමට වගේ අවට බිම ටොපි කොලයක් හෝ වැටී ඇත්දැයි විපරම් කළෙමි. එසේ තිබුණේ නැත. නොඉඳුල් වනය එපරිද්දෙන්ම තිබුණි.

අපගේ සංචාරයේ අපට ලැබුණු මගපෙන්වන්නා - රෝහණ ජයදේව මහතා, ඔහුට වනයේ සතා සිවුපාවා හා වනයේ ඉතිහාසය පිළිබඳ පරිණත දැනුමක් තිබුණි.

සංචාරය කරන්නන්ට මගෙන් උපදෙසක්

1. ඇති තරම් පානීය ජලය රැගෙන යන්න.

2. කූඩැල්ලන් අධික බැවින් දෙපා වලට යම් ආරක්ෂක උපක්‍රමයක් යොදාගන්න. (බූට් සපත්තු/විශේෂ මේස්/පැඟිරි තෙල් ඉසින හෝ සබන් වතුර)

ලංකාවේ පිහිටි අනෙකුත් වනාන්තර වලට වඩා මෙම වනාන්තරයේ මා දකින විශේෂත්වය වන්නේ දැඩී නීති රීති පාලනය හා අවට ගම්වාසීන් වනය රැකගැනීමට දක්වන දැඩි උනන්දුවයි. 

සංචාරකයන්ට පහසුකම්

දැඩි නීති රීති වගේම සංචාරකයින්ට පහසුකම් සැපයීමටද දෙපාර්තමේන්තුව අමතක කර නැත. ඒවා නම්

1.සෑම සංචාරක කණ්ඩායමකටම පුහුණු මාර්ගෝප- දේශකයෙකු සැපයීම.

2. වනාන්තරයේ විවිධ ස්ථානවල නිරීක්ෂණ අට්ටාල සහ ගිමන් හැරීමට ස්ථාන.

3. තොරතුරු මධ්‍යස්ථානයකින්, ප්‍රවේශ පත්‍ර අලෙවි කරන කාර්යාලයකින්, සම්මන්ත්‍රණ ශාලාවකින් සහ පිටත හිඳගෙන විවේක ගැනීමට සැකසුණු ස්ථානවලින් සමන්විත වූ සංරක්ෂණ මධ්‍යස්ථානය.

4. ආපනශාලාවෙන් ආහාරපාන සහ මුද්‍රිත ද්‍රව්‍ය මිලදීගත හැකිවීම.

5. විශාල පිරිසකට වුවත් නැවතිය හැකි වනය තුලම ඇති නවාතැන් මධ්‍යස්ථානය අඩු මුදලකට ලබාගත හැකිවීම.(මෙය කොළඹ වන සංරක්ෂණ දෙපාර්ත මේන්තුවෙන් කලින් වෙන්කරවා ගත යුතුය.)

6.පැල තවානෙන් වන වගාව සඳහා පැල මිලදී ගත හැකිවීම.

7. දියනෑමට අවශ්‍ය අයෙකුට ඇතුළුවීමේ දොරටුවෙන් පිටත පිහිටි “නන්නිකිත” ඇලෙන් ඕනෑ තරම් දිය නාගත හැක.

පැල තවානට පිවිසුම් මාර්ගය

ප්‍රවේශ පත්‍ර මිල ගණන් සහ මංපෙත් ගාස්තු

කන්නෙලිය රක්ෂිතය නැරඹීමට යන සංචාරකයෙකුට මගපෙන්වන්නෙකු ලබා ගැනීම අනිවාර්ය වේ. ප්‍රවේශ පත්‍රයක මිල (වැඩිහිටි) රුපියල් 30 කි. රක්ෂිතය තුල වැදගත් ස්ථාන ආවරණය වන පරිදි මංපෙත් (trails) 6ක් සකසා ඇති අතර මෙම මංපෙත් කිහිපයක් එකට ඇතුලත්වන පරිදි පැකේජ (tour plan) 3ක් සකසා ඇත.

ගුහාව මංපෙත : දුර ප්‍රමාණය කිලෝමීටර 1.5 - ගතවන කාලය පැය 01යි.
අනගිමල ඇල්ල මංපෙත : දුර ප්‍රමාණය කිලෝමීටර 2.3 - ගතවන කාලය පැය 03යි.
යෝධ පුස්වැල මංපෙත : දුර ප්‍රමාණය කිලෝමීටර 2.3 - ගතවන කාලය පැය 03යි.
යෝධ නවඳගස මංපෙත : දුර ප්‍රමාණය කිලෝමීටර 5.2 - ගතවන කාලය පැය 03යි.
නාරංගස් ඇල්ල මංපෙත : දුර ප්‍රමාණය කිලෝමීටර 5.2 - ගතවන කාලය පැය 06යි.
කබ්බලේ කන්ද මංපෙත : දුර ප්‍රමාණය කිලෝමීටර 5.5 - ගතවන කාලය පැය 06යි.

තමනට ගතකළ හැකි කාලය හා වියදම් කළ හැකි මුදලට සරිලන ගමන් පැකේජයක් තෝරාගත හැකිය.

ගමන් පැකේජ දැක්වෙන පුවරුව

අප විසින් තෝරාගනු ලැබූ ගමන් පැකේජයෙහි ගාස්තුව රු. 800/- ක් වූ අතර (කණ්ඩායමේ සිටින සාමාජිකයින් ගණන මෙයට බලපාන්නේ නැත) කාලය පැය 3 කි. එයට අයත් වූයේ ගුහාව මංපෙත, අනගිමල ඇල්ල සහ යෝධ නවඳගහ බැලීමයි. මේ පැකේජයට යෝධ පුස්වැල ද අයත්වුවත් අප එය අතහැරීය. එයට හේතුව පුස්වැල දැන් මැරී ඇති නිසාත් එය බැලීමට යාම ටිකක් දුෂ්කර නිසාත්ය.

මාර්ගෝපදේශකයාට වෙනම මුදල් ගෙවීම අනිවාර්යය නොවුනත් අවශ්‍යනම් ඔහුට සන්තෝසම් ලෙස කිසියම් මුදලක් පරිත්‍යාග කළ හැක. වැඩිම ගාස්තුවක් අයකරන්නේ සහ වැඩිම කාලයක් ගතවන්නේ කබ්බලේ කන්ද තරණය කරන පැකේජයටයි. එයට පැය 6ක් ගතවන බව සඳහන් වුවත් මුළු දවසම ඒ සඳහා ගතවේ.

මෙයට අමතරව ඇතුළුවීමේ දොරටුවට ආසන්නව හා එයට කිලෝමීටර් කීපයක් ආසන්නව පුද්ගලික නවාතැන්පලවල් කීපයක් පිහිටුවා ඇත. විවිධ මිල ගණන් යටතේ හා විවිධ පහසුකම් යටතේ ඒවා ලබාගත හැක. ඒවායින් හතරක විස්තර මෙසේය.

1. Eco Garden –Holiday Inn - 0771700893

2. Kanneliya Mount Resort - 0718640041

3. Kanneliya Forest Resort - 0777747818

4. Rain Drops Holiday Inn - 0767886518

අප නැවතී සිටියේ ඇතුළුවීමේ දෙරටුවට දෙවෙනියට ආසන්නයේම පිහිටි නවාතැන්පල වන “කන්නෙලිය මවුන්ට් රෙසෝර්ට්” හිය. ඔබගේ දැනගැනීම සඳහා මෙහි පහසුකම් හා මිළ ගණන් මෙසේය.

අප නැවතී සිටි මවුන්ට් රෙසෝර්ට් - ඈතින් පෙනෙන්නේ කබ්බලේ කන්දයි.

කාමර වර්ග 3කි.

(ඩබල් රූම් - දිනකට රු. 2000/- ඩබල් ඇඳන් 1යි - දෙදෙනෙකුට සෑහේ - ඩබල් රූම් 1ක් ඇත.)

(ට්‍රිබල් රූම් - දිනකට රු. 2500/- ඩබල් ඇඳන් 1යි/ සින්ගල් ඇඳන් 1 යි - 3දෙනෙකුට සෑහේ - ට්‍රිබල් රූම් 2ක් ඇත.)

(ෆැමිලි රූම් - දිනකට රු. 3000/- (ඩබල් ඇඳන් 2යි) 4 දෙනෙකුට සෑහේ - ෆැමිලි රූම් 1ක් ඇත.

උදයේ කෑම - රු. 200/-

දහවල් කෑම - රු. 250/-??

රාත්‍රී කෑම - රු. 500/-

වෙනත් කරුණු - මදුරුවන් නැති තරම්ය. ඒ වගේම TV එකකුත් නැත.(එය අඩුපාඩුවකි) ආහාරපාන නම් ප්‍රනීතය. නවාතැන් පලේ තම වාහනය නවතා පයින්ම කන්නෙලිය පිවිසුම් දොරටුවට ළඟාවිය හැක. 

Owner - HMS Hennayake /Contact Number - 0718640041

Adobe Illustrator - Basic Tutorial – 3 - Creating 3D looking 'Soft Toy' ඇඩෝබි ඉලස්ට්‍රේටර් - මූලික පාඩම් මාලා - 03 - ත්‍රිමාන ලෙස පෙනෙන සොෆ්ට් ටෝයි එකක් නිර්මාණය.

මෙවර ඉදිරිපත් කරන්නේ Adobe Illustrator මෘදුකාංගයේ සැඟවී ඇති විශ්මිත හැකියාව විදහා දක්වන සරල අභ්‍යාසයකි. මේ මගින් ඔබට ත්‍රිමාන ලෙස පෙනෙන ඉතාමත් අලංකාර සොෆ්ට් ටෝයි එකක් නිර්මාණය කරගන්නා අන්දම කියාදෙයි. මෘදුකාංගයේ වැඩිදෙනා භාවිතා නොකරන ටූල් හා විධාන කීපයක් ඇසුරෙන් මෙම පාඩම සකසා ඇත. පළමු හා දෙවන පාඩමේ මූලික විස්තර දැක්වූ නිසාත් අදාල වීඩියෝව ඉදිරිපත් කරන නිසාත් මෙම පාඩම කෙටි සටහන් ඇසුරෙන් ලියා ඇත. 

අදාල යූ ටියුබ් වීඩියෝව
https://www.youtube.com/watch?v=RwOL53cPVsY

පියවර 1 – Illustrator අළුත් පිටුවක් විවෘත කරන්න. (Ctrl+N)

එහි ඇති Width, Height සඳහා පිළිවෙළින් 800,600 යොදා OK කරන්න.

පියවර 2 - Tool Pellet එකේ “වෘත්ත” අඳින ලැයිස්තුවේ පහළ ඇති 'තරු' බොත්තම ('star') Select කරන්න.

කර්සරය Artboard එකට තියල ඇද්දොත් තරුවක් නිර්මාණ වෙයි. (Click and Drag) නමුත් මෙතැනදී එහෙම කරන්න එපා. ඒ වෙනුවට Tool Pellet එකේ 'star' Select කළ පසු කර්සරය Artboard එක මත Click විතරක් කරන්න. එවිට තරු සඳහා වන සංස්කරණ කොටුව විවෘත වෙයි. එහි Radius 1 හා Radius 2 යන්නෙහි කුමක් තිබුණත් Points සඳහා 32 ඇතුලත් කර OK කරන්න.

පියවර 3 - තරුව Artboard එකට සර්ව සම සමපාත කරන්න. (Align to artboard >Horizontal Align Center/ Vertical Align Center)

පියවර 4 – තරුව ප්‍රමාණයෙන් (පරිමාණයට) ටිකක් විශාල කරන්න. (Shift+Alt, and drag)

පියවර 5 - තරුවේ Outline එක (රේඛාවේ ඝනකම) 0.5pt ට කුඩා කරන්න.

පියවර 6 - තරුව එසේම තබා පැත්තකින් තරුවට වඩා ටිකක් කුඩාවට වෘත්තයක් ඇඳගන්න. (මෙසේ කරන්නේ තරුවට වර්ණ යෙදීම වෙනුවට පළමුව වෘත්තයට වර්ණ යොදා පසුව එය තරුවටද ආදේශ කිරීම සඳහාය.).

පියවර 7 – වෘත්තයේ Outline එක නැතිකර fill එකට Default , Gradient එක දාන්න.

පියවර 8 – Gradient පැලට් එකේ පළමු වර්ණය CMYK ලෙස ලබාගන්න. එහි අගයන් C=0,M=94,Y=20,K=0 එම වර්ණය 71% ක් දකුණට ගෙනියන්න. දෙවන වර්ණයත් CMYK ලෙස ලබාගන්න. අගයන් C=28,M=96,Y=100,K=34

පියවර 9 - වෘත්තයේ Gradient වර්ණය තරුවට ආදේශ කරන්න. ක්‍රමය වීඩියෝවේ දක්වා ඇත. තරුවේ Outline එක ඇතොත් එය අයින් කරන්න.

පියවර 10 - තරුවේ පිට මායිමේ හැඩය වෙනස් කිරීමට Effect>Stylize>Round Corners යටතේ එන Box එකේ Radius වල 34pt දාන්න.

පියවර 11 - තරුවේ පිටපතක් එහි මතම අරගන්න. (Ctrl+C) සහ (Ctrl+F)

පියවර 12 - මතුපිට තරුව මධ්‍ය ලක්ෂයේම තබා සමමිතිකව ඉති කුඩා කරන්න.

පියවර 13 – තරු දෙකම එකවර Select කර Object>Blend>Blend Options යටතේ එන Box එකට අදාල අගයන් ඇතුළු කරන්න. Specified Steps 100 සහ Align to Path.

පියවර 14 - නැවතත් Object>Blend>Make

පියවර 15 - දැන් තරු දෙකම එකට Blend වී ඇත.

පියවර 16 – Effect>Distort & Transform>Pucker & Bloat යටතේ එන Box එකට ඇතුළු කරන් අගයන් මෙසේය. Pucker -සඳහා (-17% )

පියවර 17 – Effect>Distort & Transform>Roughen යටතේ එන Box එකට ඇතුළු කරන් අගයන් මෙසේය. Option යටතේ Size සඳහා 17% යි. 'Relative'. Details=0 සහ Points සඳහා Smooth.

එවිට රෝස පැහැයෙන් ඔබගේ සොෆ්ට් ටෝයි එකේ මතුපිට නිර්මාණය වෙයි.

පියවර 18 – Direct Selection Tool එකෙන් කුඩා තරුව පමණක් ප්‍රවේසමෙන් තෝරා එය තරමක් උඩට ගෙනියන විට සොෆ්ට් ටෝයි එකේ හැඩය මනාව නිර්මාණය වෙයි.

පියවර 19 - කැමති ආකාරයට ඇස් දෙකක් සහ නහයක් සාදා නිර්මාණය අලංකාර කරගන්න. ත්‍රිමාණ බව උළුප්පා පෙන්වීමට ටෝයි එක යටට ෂැඩෝ එකක් සහ පසුබිමට Gradient Back එකක් යොදන්න.

- අයෝම ජයසිංහ 2017 ඔක්තෝබර්
ayolanka@gmail.com

Adobe Illustrator - Basic Tutorial – 2 Create a Vector Lotus Flower ඉලස්ට්‍රේටර් - මූලික පාඩම් මාලා - 02 - නෙළුම් මල් මෝස්තර රටාවක් නිර්මාණය කිරීම

ඇඩෝබි ඉලස්ට්‍රේටර් - මූලික පාඩම් මාලා - 02 - නෙළුම් මල් මෝස්තර රටාවක් නිර්මාණය කිරීම.

මෙවර ඉදිරිපත් කරන්නේ අලංකාර ලෙස නිර්මාණය කරගත හැකි මල් මෝස්තර රටාවකි. පළමු පාඩමේ දැක්වූ ආකාරයට වඩා වෙනස්ම ටෙක්නික්ස් භාවිතා කරන නිසා ලාංඡන නිර්මාණයේ යෙදෙන අයට මෙය ඉතා ප්‍රයෝජනවත් වේ යැයි සිතමි.

පියවර 1 – Illustrator විවෘත කර අළුත් පිටුවක් විවෘත කරන්න. ක්‍රමය - Key board වල Ctrl බට්න් සමග N බට්න් එක ප්‍රෙස් කරන්න. (Ctrl+N) එවිට පහත සංවාද සටහන විවෘත වේ.

එහි ඇති අගයන් රූපයේ පරිදි වෙනස් කර OK කරන්න

එවිට හරි හතරැස් Art board එකක් විවෘත වෙයි. දැන් ඇත්තේ මේ මත ඔබේ නිර්මාණය ගොඩනැගීමයි. Tool Pellet එකට අවධානය යොමු කරන්න.

පියවර 2 – Key board වල 'L' ප්‍රෙස් කරන්න. එවිට ඉලිප්ස (වෘත්ත අඳින) tool එක select වෙයි.

පියවර 3 - Tool Pellet එකේ fill එක “නැති කර” stroke එක දාන්න. 

රූපයේ පෙනෙන පරිදි විය යුතුයි.

පියවර 4 – කර්සරය Art board එක මැද click කර පහලට ඇද දළ වශයෙන් රූපයේ පෙනෙන පරිදි ඉලිප්සයක් ඇදගන්න. එය ප්‍රමාණයෙන් ටිකක් කුඩාවට ඇදගන්න. එවිට එය select වී ඇත්නම් එහි හතර වටේටම Edit කරන්න පුළුවන් ලක්ෂ හතරක් ඇති වන බව ඔබ දැනටමත් දන්නා කරුණකි. 

පියවර 5 – Key board වල 'P' ප්‍රෙස් කරන්න. එවිට (පෑනෙන් රූප අඳින) Pen tool එක select වෙයි.

එය ප්‍රෙස්කරගෙනම ඉන්න. එවිට පෙන් ටූල් වලට අදාල අනෙක් බට්න්ස් ලැයිස්තුවක් ලෙස පහළට දිග හැරේ. එහි පහළම ඇති ඇන්කර් පොයින්ට් බට්න් එක (Convert anchor point tool) select කරන්න. එහෙම නැත්නම් එක්වරම Keyboard එකේ (Shift+C) ප්‍රෙස් කරන්නත් පුළුවන්.

පියවර 6 – දැන් කර්සරය පහත රූපයේ පරිදි ඉලිප්සයේ උඩ ලක්ෂයත්, පහළ ලක්ෂයත් පිළිවෙලින් click කරන්න.

එවිට ඉලිප්සයේ උඩත් යටත් වක්‍රාකාර හැඩය අහෝසි වී උල් හැඩයක් ගනී. හරියට ගහක කොලයක් වගේ.

පියවර 7 – අපි දැන් මේ රූපයේ එහිම පිටපතක් ගනිමු. පළමුව Key board එකේ 'V' ප්‍රෙස් කරන්න. කර්සරයෙන් නැවත රූපයට click කරන්න. මෙහෙම කරන්නේ නිවැරදිව රූපය යළි select කිරීම සඳහාය.

දැන් Key board එකේ Alt බට්න් එක ප්‍රෙස් කරගෙන ඉඳිද්දීම කර්සරය රූපයේ දාරයක් වෙත ගෙන යන්න.( click කරන්න එපා.) එවිට කර්සරයේ ඊතලයේ හැඩය වෙනස්වන බව (ඩබල් ඊතලයක් සටහන් වේ) ඔබට පෙනේ. දැන් රූපයේ දාරයක් click කර Art board එක දිගේ පහලට ඇදගෙන යන්න. (මෙයට කියන්නේ click and Drag කියාය.) සියල්ල රිලීස් කරන්න. එවිට ඉබේම කලින් ඇඳ තිබූ රූපයේ පිටපතක් පහසුවෙන්ම නිර්මාණය වේ. රූපය බලන්න.

පසුව ඉහත දැක්වූ ආකාරයට රූප දෙකම එකක් යට එකක් සිටින පරිදි (තුඩට තුඩ හරියටම ගෑවෙන්න) පිහිටුවා ගන්න.

පියවර 7 – ඊළඟට රූප දෙකම එකවර select කරන්න. (රූප දෙකම ආවරණය පරිදි කොටුවක් ඇඳීමෙන් මෙය කළ හැක) ඊළඟට Key board එකේ Ctrl බට්න් සමග "G" ප්‍රෙස් කරන්න. එවිට රූප දෙකම තනි ගොනුවක් හෙවත් ගෲප් බවට පත්වේ. එහි නව ගුරුත්ව කේන්ද්‍රය රූප දෙක ස්පර්ශ වන ස්ථානයේ පිහිටයි. මුළු රූපයම Art board එකේ මධ්‍ය ලක්ෂයට සමපාත කරන්න. (එය නිවැරදිව කරන ආකාරය අංක 1 පාඩමේ පියවර 7 හි දැක්වේ.)

පියවර 8 – අප දැන් යන්නේ පාඩමේ සිත් ගන්නා සුළු කොටසටයි. රූපය select තත්වයේ තිබෙද්දීම මෙනු බාර් එකේ Effects ප්‍රෙස් කරන්න. මේ ආකාරයට යන්න Effects > Distort & Transform > Transform. පහත රූපය බලන්න.

එවිට පහත සංවාද කොටුව (Dialog Box) විවෘත වෙයි.

ඉහත රතුවෙන් දක්වා ඇති ස්ථානයන් පමණයි අප වෙනස් කරන්න යන්නේ. එහි Angle සඳහා '15' යොදා Preview බට්න් එකට හරියක් " √" දාන්න. එවිට ගුරුත්ව කේන්ද්‍රය වටා රූපයේ එක් භ්‍රමණයක් ඔබට පහත රූපයේ පරිදි දැකගත හැකිය. දැන්ම 'OK' කරන්න එපා.

සංවාද කොටුවේ "Copies" ඉදිරියේ ඇති හිස් කොටුව තුල ඇති "0" ළඟ කර්සරය click කරන්න. දැන් Key board එකේ ඊතල තුනේ සෙට් එකේ ඉහළ ඊතලය (Up Arrow Button) වරින් වර click කරගෙන යන්න. සිදුවන්නේ කුමක්දැයි ඔබට පෙනේ. සියළු මල්පෙති නිර්මාණය වූ පසු සංවාද කොටුව 'OK' කරන්න. ඔබේ මල් පෙති මෝස්තර රටාව පහත පරිදි විය යුතුය.

මේ මල් පෙති රටාව Select කළත්, Deselect කළත්, Select වන්නේ එක ඩබල් මල් පෙත්තක් පමණි. මෙසේ තිබෙද්දී පාඩම ඉදිරියට ගෙනයාම කළ නොහැක. මේ නිසා මුළු රූපයම අපට අවනත තත්වයට ගෙන යායුතුය. මේ සඳහා යමක් කළ යුතුය. 

පියවර 9 – මෙනු බාර් එකේ Object මෙනුව දිගහැර Expand Appearance යන්න තෝරන්න. (Object > Expand Appearance) එවිට අපගේ ඉලක්කය සැපිරේ. රූපය දිගටම Select තත්වයේ තබන්න .

පියවර 10 – දැන් තිබෙන්නේ මෙය වර්ණ ගැන්වීමයි. පළමුව වර්ණ පැලට්ටුව ලබාගත යුතුය. මේ සඳහා Windows > Swatches මාර්ගයේ ගොස් එම පැලට් එක විවෘත කරවා ගන්න.

මෙවැනි රූපයක වර්ණ යෙදීමට විශේෂ ක්‍රමයක් සහ විශේෂ ටූල් එකක් යොදා ගනී. Key board එකේ "K" ප්‍රෙස් කරන්න. එවිට Tool Pellet එකේ අදාල ටූල් එක එනම් "Live Paint Bucket" ටූල් එක Select වෙයි. 

කර්සරය සිගරට් කොටයක් වැනි රූපයකට හැරවී ඇති බව පෙනේ. දැනට Select වී ඇති රූපය මතට කර්සරය ගෙනයන්න. (click කරන්න යන්න එපා) මලෙහි කොටස් වෙන වෙනම Select වීමට ආසන්න බව ඔබට වැටහේවි. ඒ එක්කම කර්සරය Swatches වල ඔබ කැමති පාටකට (වර්ණ පැලට් එකේ) click කරන්න. දැන් කරසරයට අවශ්‍ය වර්ණය උරාගෙන ඇත. මල් මෝස්තරයේ ඔනෑම කොටසක් තුලට කර්සරය click කරන්න. ඔබ ලබාගත් වර්ණය එහි සටහන් වෙයි. රටාවකට මෙන් මල් පෙති කොටස් පාට කරන්න. පහත පරිදි.

ඔබට මේ ආකාරයට වර්ණ 3 ක් යොදා මල් මෝස්තරය පාට කළ හැකිය.

අමතර වශයෙන් මේ මල් මෝස්තරට තව අංග එක්කිරීමෙන් ඔබට එය තවත් ලස්සන කළ හැකිය. පහත පරිදි මලට යටින් Gradient ක්‍රමයට වර්ණයෙන් කළ වෘත්තයක් යොදා ඇත. 

මෙය තවත් ලස්සන කිරීමට මේ පාඩමේ මුල දැක්වූ ඩබල් මල් පෙත්ත ආකාරයේ පහත පරිදි වෙනස්ම හැඩයක් නිර්මාණය කරගත හැකිය.

(මෙවැනි හැඩයක් නියම ක්‍රමයට ඇඳගත යුතු ආකාරය අවශ්‍ය අයට කියාදෙන්න මා ලෑස්තියි.) එම හැඩය Gradient ක්‍රමයට වර්ණ ගැන්වූ පසු

එහි කොපියක් ගෙන පහත ආකාරයට සකසා ගෲප් කර පසුව Art board එකට සර්ව සමමිතික කරගන්න. පහත පරිදි

මෙම කොටස මල්මෝස්තර රටාවට යටින් තැබීමට අමතක කරන්න එපා. පහත පරිදි

දැන් අළුත් ඩබල් මල් පෙත්තට පියවර 8- හි දැක්වූ Rotate ටෙක්නික් යොදන්න. එවිට පහත පරිදි දර්ශනීය රටාවක් ලබාගත හැකිය.

මේ ක්‍රමයටම නිර්මාණය කරන ලද තවත් මල් මෝස්තරයක්.

ඊළඟ පාඩමෙන් පහත දක්වා ඇති ත්‍රිමානව දර්ශනය වන ලස්සන සොෆ්ට් ටෝයි (Soft Toy) එකක් නිර්මාණය කරගන්නා අන්දම බලාපොරොත්තුවන්න.

මෙය අන්තර්ජාලයේ තිබූ පාඩමක් ඇසුරින් මා විසින් නිර්මාණය කළ ලද්දකි.

පාඩම සැකසීම - අයෝම ජයසිංහ 2017 සැප්තැම්බර්
ayolanka@gmail.com